fbpx
السبت , سبتمبر 25 2021

حكاية هذا على راس هذا…

منذر بن عطية

سوسو تقول لأمها “هاني بش نبات في دار فوفة صاحبتي”، وفوفة تقول لأمها “هاني بش نبات في دار سوسو صاحبتي”..
فوفة تبات في شقة مفروشة في النصر مع صاحبها وكي تجي تروح يعطيها دبوسة بارفان سرقها من ڨلص أختو (جاتها في ملاكها من خطيبها الاول اللي بطلت منو خاطر يخون فيها)،
سوسو يهزها صاحبها سيد أحمد لدار صاحبو اللي كاري وحدو وكي تجي مروحة يعطيها دبدوب راسو أحمر و شاد في ايديه قلب.
نوسة ما تكذبش، نوسة حداثية فرنكفونية في عايلتهم ما يكذبوش كيما “العرب” وتعودت الصراحة، نوسة قالت لبوها وأمها بش نسهر أنا ودودو في الحمامات ونباتو غادي، سواري وشامبر وماساج بلاش… شوية ديفولمون… بوها حملها وباسها وقاللها رد بالك على روحك، أمها حطتلها في ساكها بعض وسائل “الوقاية” من حوادث الحب، وبعد حلت تلفونها جات قدامها تدوينة تقول “النهضة تتوعد وتهدد التوانسة” كتبت تعليق “يا كلاب يا تجار الدين، اخرجوا من بلادنا هلكتوها”.
زهرة، زوالية وتحب تكبري وتحب “التنمّط”… زهرة تخدم في معمل، بوها ما يخدمش وخوها زبراط وفصالة، زهرة طايح بيها شيفور في شركة نجارة تخرج معاه كل نهار سبت تطلع معاه في الكرهبة ومايهبطوش لحتى قهوة خاطر سي الغراب ما يحبش المصروف، يهز قهوة في قوبلي ومرة يعمل رشفة قهوة ومرة رشفة من شفايف زهرة وما تهبط المغبونة إلا ما “تتبزع” القهوة على سروالو… زهرة برنامجها في سان فالنتان شايح… خاطر سي الغراب يجيها قبل كل مناسبة ويعمل معاها عركة ويطفيها حتى تتعدّى سحابة الهدية، يعاود وقتها يرجعلها ويقوللها راك مرتي ويرجعوا يترشفوا في القهوة في الكرهبة لين تجي مناسبة يتسبل كالعادة ويسبها ويقوللها يا “قهوة”…
نرجعوا لسوسو، صاحبها سيد أحمد من حومة شعبية ومن بيئة محافظة، ديما يقول لأصحابو البنات عدموا وينظر لسوسو على أنها “قهوة” وماهيش متاع عرس، تقدم بيه العمر ويلزم يعرّس، بش يكلّف أختو تشوفلو بنية دافية وبنت عايلة، أختو تتذكر عندها قريبتها زوالية وعاقلة إسمها زهرة… سيد أحمد بش يعرّس بزهرة متاع “القهوة”… على خاطر سوسو بالنسبة ليه “قهوة”… وسوسو بش ياخذها قريبها اللي هو بيدو كانت عندو “قهوة”… وقهوة هذا على راس هذا… وحكاياتنا هابا هابا وكل عيد حب تجينا صابة.
#أبوحيدر

شاهد أيضاً

رمضان 2010

منذر أبو حيدر بثت قناة حنبعل برنامج تنشطه انصاف اليحياوي التي تقوم بزيارة عائلة تونسية …

ألمانيا بين.. هايدا لمام و ياسين العياري

منذر أبو حيدر ما أشبه الكرة بالسياسة فرانك كوم لا عب كبير، لكن دخوله للترجي في …

اترك رد