fbpx
الثلاثاء , سبتمبر 28 2021

في مكتب انتخاب عام 2019

الحبيب حمام

المشرف على المكتب: بطاقة تعريفك لو سمحت
الناخب: بطاقة شنوّه؟
المشرف: تعريف
الناخب: Tarif شنوه؟ جاي ننتخب راني، موش نبيع ونشري
المشرف: بطاقة تعريف وطنية، هذيك في جيب السورية، هاني نشوف فيها
الناخب: هاهي خوذ
المشرف: هذاك باكو الزطلة، لخرى، هاني جبدتها وحدي، وقّع هنا
الناخب: ننجم نبْصم بصبعي يا لخو؟ قلي أنت ولد شكون؟
المشرف: شهمك فيّ ولد شكون، ما تعرفش تكتب
الناخب: مانيش كتّاب، زطال، جاي ننتخب في البجبوج، هات الرشام
المشرف: اسمو قلم، سي المواطن، وقتلك توقع في السجل، موش فوق صبعي
الناخب: ما قتليش، بوك الجزار اللي يبيع في لحم البهيم؟ ناس ملاح، نزطلو جميع، هاني بصمت، أيه، انّستم، يرحم بوك
المشرف: فين ماشي؟ علاش جيت؟ امش انتخب
الناخب: ولا شكنت نعمل؟
المشرف: أنت وقعت باش نعرفوا أنك انتخبت، امش غادي للخلوة
الناخب: يخي وينو الطيّاب؟
المشرف: طيّاب شنوه؟ راك في مكتب اقتراع موش في حمّام
الناخب: نمشي نبدل حوايجي ورا هاك الملحفة، ما جبتش تبديلة
المشرف: تي هاو مظلّم جملة، بجاه ربي كيفاش باش تنتخب، تعرف البرامج الانتخابية متاع المترشحين؟
الناخب: جاي ننتخب متاع الزطلة، اللي برنامجو زطلة
المشرف: بره امش انتخب ورا الملحفة غادي
الناخب: أيه، بسم الله
المشرف: زطلة وزيد “بسم الله”… يا ولدي خلي الصندوق غادي
الناخب: متاعي، أنا لقيتو، متاعك هو الصندوق؟ كيف موش متاعك اسكت، أنا لقيتو موش أنت، سلّم على بوك، وقلّو يقرا لي حسابي في زوز كيلو لحم كرومة، وقلو جحش موش بهيم<
المشرف: يا ولدي هات الصندوق، قالو سلّم على بوك، ولحم جحش
الناخب: قلّو يزيدني كيلو مرڨاز
المشرف: هات الصندوق، قالو مرڨاز
الناخب: وقلّو الليلة السهرة في حانوت عمّ صالح.

شاهد أيضاً

كن مع شعبك وإن فسق وتاه

الحبيب حمام على خلاف موسى وعيسى عليهما السلام، حيث كانت دولتان الروم والفراعنة، أسس محمد …

الحاكم العادل ليس ذلك الذي يحضن المواطنين

الحبيب حمام مرّ عمر بن الخطاب رضي الله عنه بباب قومٍ وعليه سائل يسأل، شيخ …

اترك رد