fbpx
الخميس , يوليو 7 2022

ملخص خطاب صاحب الكاريزما

عادل بن عبد الله
فبحيث، أنا جبت الشاهد لأنو ولد عايلة وبلدي من قاع الخابية وقلت زيتنا يبقى في دقيقنا، ووصيتو باش يحط الزيت في القريقية ويسمع الكلام لا نمرمدو كيف اللي قبلو، لكن هو حب يعمل كيف ما يقول هاك المثل “جا يعاون فيه على قبر بوه، هربلو بأختو”…
وأنا قلت للمسؤول الكبير الحكاية هاذي مستحيل تكون إلا بنت وذنو ومانيش باش نسكت، وقابلت الأستاذ راشد وحكينا على التوافق وحلف لي بسيدي بلحسن انو ماعندوش لا يد لا ساق في الحكاية. فبحيث، بما أني كيما قال هاك الفاسق “سي الباجي موش يرضع في صبعو” مازلت لتوا مانيش مصدق انهم يحبوا يهزوني للحلقوم. وأنا جيت الليلة باش نعزي سكان نابل في الناس اللي ماتوا، ونقلهم “الموت عليكم وعلى الشعب الكل حق”. وحبيت نقول للشعب التونسي راهو الزعيم في قبرو موش مرتاح، وراهو جاني البارح في المنام وقلي “يا باجي، بدل عتبة الدار”، وأنا ما فهمتش آش يقصد: نبدل النهضة وإلا نبدل المستشارين متاعي وإلا نمشي نبدل الجو أيامات في فرانسا… فبحيث، نطمنكم أني لاباس وأني مانيش ناوي نترشح عام 2024، ونطمنكم أنو البلاد ماهياش باش تدخل في حيط، وحتى كان خايفين من الحيط، احمدوا ربي ماناش كيف بلدان أخرى ما بقى فيها حتى حيط، واللي حاسس أنو الأمور موش هي ما عليه كان يتذكر هاك الحكمة القمقومة متاع سيدنا حوس “إذا طحت من الشباك أحمد ربي عندك شباك”… والسلام عليكم

شاهد أيضاً

النخبة التونسية.. جزء من الحل أم مظهر من مظاهر الأزمة ؟

عادل بن عبد الله لا شك في أن أغلب النخب التونسية تنتمي إلى ما اصطلح …

من هم “الكفاءات المستقلة” ؟

عادل بن عبد الله هم أولئك الذين أداروا نظام بن علي الفاسد والتابع في الصفوف …

اترك رد